Ihakhimagit Inuuhirmut Ublunga Hulilukaarniq

Saptaipa 10mi Nunavuutim Ihakhimagit Inuuhirmut Ublunga unalu Nunaryuarmi Inmiknik Pittailiniq Ublunga. Tamna Kitikmeot Inuit Katimayiingit pipkaitjutigivagaa Ihakhimagit Inuuhirmut Ublunga hulilukaarniq tamapkivyaktuni Kitikmeotmi ikayuqturlu hulilukaarnimik nunavunmi. Ihumagilluarhugit nakuutqiyauyumik naunaipkainiq ihuarhainahuarhugulu piinarialaqiniq ikayuriamikni ilihaitjutikhamik allatlu nunallaani timiqutigiyauyut, naunaipkaitjut naunaittiaqhimayuq: “Quviahuutigilugu Inuuhiq” quviahuklutillu iliknik kinaukmangat.

Kiilinik Angayukhiit Sikuurvingani Iqaluktuutiaq hivuliqtingit, inirnikhangit ukuallu inmiknik pinahuaqtuugaluat ukuat ilagiiktunit ilannangillu, uqaqatigiyangit sikuuqtut ayurhautigiyamiknik, inngummautigiyanginnik kitkulu ikayuqtaaqtut nunamikni. Uqaruiqmata, nampauyuq Iqaluktuutiaqmiutat ilauyut pihukhutik Iqaluktuutiaqmi nutqaqattarhutik allatqiini nunallaani timiqutigiyanginnik ikayurhutik inminiiktailiqniq pittailikniqmik ilihaitjutikhat ukuat munarhivingat, inuuhiriknirmut nakurutjutiniq katimavinga Paliihimallu. Nutqaraangamik ilauyut tuniyauyut makpiraamik nakuuyunik titiraqhimayunik atuqtaaqtamikniklu. Tamna pihukniq iniqtiqtauyuq niripkaivlutik inuknut naunaipkaiplugu itqaumayakhanginnik ublungani talvani: “Quviahuutigilugu Inuuhiq” ilauyullu uqaqtunit hivuliqtiuyunit inirnikhanillu, ilitariplugit ikayuqtautikhamiknik nunagiyamiknit taktakhaqarhutiklu.

Aatjikutaanik piyut Taloyoakmi, Kugaarukmi, Urhuqtuumi, Kugluktumilu mikitqiyauyunik hulilukaaqarhutik pihukhutiklu nunavunmi. Inngummaguvit ihumagiliruvilluuniit allamut haatirviittuq amigaitpuq inuit timiqutigiyauyullu nunagiyarni ikayuqtaaqtut, ikayuqtautikhivaklugit.

Amigaittut-Tuhaqtipkaiyut Inuulramiit Hivuliqtiuyut Ayuirhaiyut

AJJIKAMRA

IMay 2007mi, 16nguyut inuulramiit Kitikmeotmit ayuirhaqtitauyut amigaittuni tuhaqtipkainiqmut inuulramiitlu hivuliqtiuyukhanik. Ilauyut ayuirhaqtut unipkaanik  tutquqtiriumik, apirhuivlutik, piksaliurhutik nutqangayunik piksasuuliurhutiklu, piksasuuliurninginnik ihuarhaivlutik unalu piksassuuliurniq. Apirhuqhutik inirnikhanut, nunamikni, maniqqamilu, ilauyut pipkaitjutauyut naunaitqiyauyumik inuinnauyumut angikliyuumiqhugiklu qangaraaluknitat ilihimaniq hivuliqtiunirmiklu.

Ilihaitjutingat maniqqarmiipkaiyangillu inirnikhat inuulramiitlu maniqqamiutaq Ovayokmi talvani ilihaqtut ilihaqpagait nutaat amigaittut-tuhaqtipkainiq ayuirhainingit. Inirnikhat ilihaqtullu apirhuqtauyut akhuurutautinganik maniqqami ittaami ayuirhaqtullu qangaraaluknitanik inuuhiraluanginnik, qangaraalukmi ingilrautigiyangit, qangaraaluknitat nunat atingit, hivuliqtiuniq unalu hilaup aallanguqtirininnganiklu.

Tamna ilihaitjut nakuuqpiaqtumik iniqtiqtauyuq Kitikmeot Inuit Katimayiingit pipkaiffaariamikni allamik Ilihaitjutikhamik akhuuquplugik inuulramiit iqimmilugit ilitquhingit, pitquhingit, uqauhingitlu. Aturumik nutaanik nutaanguqpalliayunik qaritauyanik, piksaliurutingit qaritauyakkutlu pulaarvinginnik, inuulrammiivut piinariaqaqtaat akhuurutauyumik havaamik titirarumitku piksaliurumitkut tammaqtailivlugu atuinnaqtaptiknik ilitquhivut. Tautugumagukni piksassuuliurhimayuq una AJJIKAMRA, pulaarlugu qaritauyakkut uumani http://www.youtube.com/watch?v=DL8axjlCyeg

Kitikmeonmi Inuulramiit Katimatjutinga 

AJJIKAMRA 2

Pipkaiptauninnganit nakuuyumik pikmat hivulliqpaaq Ajjikamra havauhiq,  Kitikmeot Inuit Katimayiingit maniitugut ikayuqtangit Nunavunmi Inuulramiit Hivuliqtiugiamikni Iliharvikhangitnik Iqaluktuutiaqmi Maatsi 2008mi. Ihumagilluarhugit pipkaiyuq amigaittukkut tuhaqtipkaitjutikhanik ayuirhainiq unalu inuulramiit hivuliqtiugiamikni, 23nguyut sikuuqtut tamainni Kitikmeonmit ilauyut atauhiqmi Santimik katimapkaitjutiuyuq. Naunaiyarhimavakluhi tuhaagakhamik, piksanik, piksassuuliurhimayuniklu.

Inuinnaqtun Qilautikkut Numiktut Katimapkaitjut

Drum Dance

Kitikmeot Inuit Katimayiingit Nunataarhimayut Havakvinga, ikayuqtauqarhutik Kitikmeot Ilitquhiitigut Katimayiuyut, Kaanatami Hanaugaliurniq Katimayiingit, BHP-kut Diavikunnillu, qilautikkut numiqtunik katimapkaiyut Maatsi 5mit 9mut, 2007mi Kugluktukmi. Tamna katimapkaitjut pipkaitjutigiyaat tammaqtailiquplugu Inuinnaqtun pihiit numiutingillu katimapkaivlugit 13nguyut inirnikhat Kugluktukmit, Iqaluktuutiamit, Ulukhaktuumillu havaktullu Kitikmeot Inuit Katimayiinginnit Kitikmeot Ilitquhitigut Katimayinginnit.

Tamna katimatjut tautukhugit titiraqhugillu nipiliurhutillu tammaqtaiyukhaunngittut pihiit numiutainniklu inuinnait pitquhinginnik unipkaarniqmilu, ihumagilluarhugit ilitquhingit unipkaangillu Inuinnait (Inuinnaqtun uqayuktut) nunallaat Kitikmeonmi. Aatjikutariuqhugit aallatqiingillu qilautikkut numgutingit, pihiit atuqningit, aanuraat numgutingit numirhitqiyauyuniklu naunaittut tamainni nunallaani, tamna katimapkaitjutaut naunaiqtaa amigaittunik piqaqniq unipkaanik tammaqtailivlugitlu ilitquhivut atuqtakhangit nutaqqavut innguttavut.

Amigaittunik piqarniq unipkaanik ilitquhiniklu inuinnait ihuarhautiginiaqtuq amigaittukkut piksaliurhimayunik piksassuuliurhimayuniklu katimatillugit hitamanik nampanganiklu ublunik. Kitikmeot Inuit Katimayiingit niriuktut havaqatigiamikni havaqatingit hakugikhimmaariamikni utuqqauyut naunaitkutinga uumani amigaittunilu atuqtauyut pitquhiptikni.

 

Nunavunmi Inirnikhat Inuulramiillu Maniqqamiinniq Umingmaktuuq Hiukitak/ Higakvik​ 

Kitikmeot Inuit Katimayiingit pipkaitjutigiyaat tuglianik ukiumi nunavunmit inirnikhat inuulramiillu auyami maniqqamiinniq nutaami Nungulaittailinirmut Nayugaa haniani Higakvik Kangirhunnga uumanilu Hiukitak Kuugaq, ittuq 50kilaamiitamik hivuraavyaani kivataanit Umingmaktuuq. Hiuqpaluittumik hilamiutaq kangirhuq uqqukmiutaqarhuni imanga uyaraliaqarhunilu hinaa, Higakvik Kangirhua piqaqpiarhuni pitquhiuyumik ilitquhimik, nakuuqpiaqtumik nuna aullaarvikhaptiknik. 52nguyut inirnikhat, inuulraamiit munaqtiqarhunilu, hulilukaarutingit tuktuhiuqhutik nattiqhiuqhutiklu, aminik havakhutik, kakivaliurhutik ululiurhutiklu, mirhuqhutik, qayakkuurhutik, paungaqtarhutik, unipkaarhutik, qilautikullu numirhutik.

Itqaumapkaivlutik inirnikhat, pulaarhutiklu utuqqanut nayuqtauvaktuugaluanut qangaraaluk, ilihainiqlu qangaraaluknitat hanalrutingitnik, ilauyut ayuiqtut amihunik qangaraaluknitaq inuuhimiknik, nunagiyamiknik ilitquhinginniklu. Ilanut inirnikhanut 30nguqtuq ukiunik talvunga pulaalihaaqtut, tamaita quviahuktut ilihimaliramik ahiruqtaulimaittuq hivuniptikni atuqtakhamiknik. Ilangit inirnikhat halikaaptakkuuqtut piumayauyumut Nungulaittailinirmut Nayugaa, halikaaptakuutigivlugu Geoff Clark unalu Shaun Kuliktana Kugluktuk Avatiliriniqmut, Nunanga Atuqtakhangillu Havakvinganit.